ТУҒАН ӨЛКЕМ-ТҰНҒАН ШЕЖІРЕМ

Еліміздің рухани астанасы Түркістан қаласына саяхат.

2023 жылдың 15 сәуір күні №36 Ә.Тәжібаев атындағы мектеп-лицейінің білім алушылары еліміздің рухани астанасы Түркістан қаласының киелі орындарына саяхатқа шықты.

Мектеп оқушыларының өмірінде "жаңа қазақстандық патриотизм мен азаматтықты тәрбиелеу", "рухани-адамгершілік тәрбие", "ұлттық тәрбие", "көпмәдениеттік және көркем-эстетикалық тәрбиенің" алатын орны ерекше. Баланы Отанын құрметтеуге тәрбиелеу - ертеңгі ел болашағы болып табылады. Сондықтан да бұл тарихи саяхаттың маңызы ерекше.

Саяхат басы Қожа Ахмет Яссауи кесенесінен басталды.

Қожа Ахмет Яссауи кесенесі - ортағасырлық сәулет өнері ескерткіші. Түркістан қаласында орналасқан. 1396-1399 жылдары Әмір Темірдің бұйрығымен Қожа Ахмет Яссауи қабірінің басына тұрғызылған. Көптеген жазба деректерге қарағанда, болашақ құрылыстың жобасын жасауда Әмір Темір тікелей өзі қатысып, негізгі өлшемдерді анықтаған көрінеді. Кесене - үлкен порталды-күмбезді мемориалдық құрылыс.

Саяхаттың жалғасы "Керуен сарай" туристік кешенін тамашалаумен жалғасын тапты.

«Керуен-сарай» кешенінің Орталық Азияда баламасы жоқ және ол Қожа Ахмет Яссауи кесенесінен кейін өңірге туристер мен инвестицияларды тартатын басты орталыққа айналған кешен.

Кешенге кіргенде алдымыздан бірінші болып алтын жұмыртқа салынған үлкен ұя шықты. Бұл қазақ мифологиясындағы қыран тәрізді алып құс – Самұрықтың ұясы.

Ғимарат "Алтын Самұрық" деп аталады. Ішінде ұшатын театр бар. Еліміздің өткені, бүгіні және келешегінің көрінісі осы театр-музейде көрсетіледі.

Осындай керемет дүниелермен танысып, оны көзбен көріп саяхаттаған оқушыларымыздың қуанышында шек жоқ.

Туған өлкені тану мақсатында еліміздің рухани астанасы Түркістан қаласына саяхат жасау - оқушылардың туған жерге деген махаббаты мен құрметін арттырды.